Жетісу облысында үшінші қант зауытын салу бойынша инвесторлармен келіссөздер жүргізілуде. Жаңа өндірісті пайдалануға беру тәтті тамыр дақылдарын өңдеу көлемін 1 млн тоннаға дейін арттыруға мүмкіндік береді. Бұл туралы облыс әкімінің баспасөз қызметі хабарлады.
"Біз Көксу қант зауытын жаңғыртуды бастаймыз. Жаңартудан кейін ол жылына 500 мың тонна қызылша өңдей алады. Бұл мақсаттарға 60 миллион еуро көлемінде инвестиция тартылуда. Ақсу қант зауыты тағы 350-400 мың тонна өңдейді. Нәтижесінде біздің өңір 800-900 мың тонна қант қызылшасын өңдей алады. Бұл ретте айналымға енгізілетін суармалы жерлердің ауданын, оның ішінде ирригациялық желілерді реконструкциялау бойынша жүргізіліп жатқан жұмыстар есебінен ұлғайтатын боламыз. Егер үшінші қант зауытын салсақ, онда тәтті тамыржемісті өңдеу көлемі 1 млн тоннаға жетеді", - деді облыс әкімі Бейбіт Исабаев.
2024 жылы Жетісу облысында қант қызылшасының рекордтық өнімі -630 мың тонна жиналды. Бұл тәуелсіздік жылдарындағы ең жақсы нәтиже. Алайда, аграрлар шикізатты қайта өңдеуге тапсыруда қиындықтарға тап болды. Бейбіт Исабаев түсіндіргендей, Ақсу қант зауытында өңдеу үшін аймаққа Жамбыл облысынан 100 мың тонна қант қызылшасы әкелінді. Осы кезеңде зауыттардың қуаты келіп түскен егіннің барлық көлемін қабылдау үшін жеткіліксіз болды.
2025 жылы облыста ауыл шаруашылығы өнімдерін қайта өңдеу жұмыстары күшейтіледі. Қазіргі уақытта құс фабрикасы мен жүгері өңдеу зауытын ашу бойынша инвесторлармен жұмыс жүргізілуде. Жетісу облысында қант қызылшасы, жүгері, бидай, ет, сүт және басқаларын қоса алғанда, өңірде өндірілетін ауыл шаруашылығы өнімдерінің 65%-ы өңделуде.
