Атырау облысының Индер және Құрманғазы аудандарында жануарлардың аса қауіпті ауруларының үш ошағы анықталды, деп хабарлайды Kazinform.
Облыстық ауыл шаруашылығы және жер қатынастары басқармасының басшысы Амангелді Саламаттың айтуынша, аса қауіпті аурулардың ошақтарында шектеу және карантиндік шаралар қабылданып, тиісті жұмыстар жүргізілді.
"Биыл облыста жоспарлы іс-шараларға сәйкес ауыл шаруашылығы жануарлары 11 түрлі ауруға қарсы 3 млн 551 мың 758 доза вакцина алды, бруцеллезге 1 млн 50 мың 940 қан сынамасы алынды. Ауру жануарлардың иелеріне жергілікті бюджеттен тиісті өтемақы төленді", - деді Амангелді Саламат.
Оның айтуынша, соңғы үш жылда облыс аумағында улы қарақұрт өрмекшілерінің саны артып, нәтижесінде ауыл шаруашылығы жануарлары, соның ішінде түйелер қатты зардап шегуде.
"Маусым-шілде айларында 485 түйені қарақұрт шағып, 90-ы өлді. Симптоматикалық емнің арқасында 306 түйе сауығып кетті, қазіргі уақытта 89-ы емделуде. Өлген мал иелерінің шығыны 65 млн теңгеден асты. Жылдан жылға жағдай, өкінішке орай, күрделене түсуде, бұл жануарлар иелерін алаңдатады", - деп атап өтті Амангелді Саламат.
