Қазақстанда ауыл шаруашылығы машиналарын жасаудағы үш жоба бір жылда іске қосылды

2024 жылы Қазақстанда жалпы құны 5,7 млрд теңге болатын ауыл шаруашылығы машина жасау секторында үш өндіріс іске қосылды. Жобаларды іске асыру 172 тұрақты жұмыс орнын құруға мүмкіндік берді, деп хабарлады Qazindustry қазақстандық индустрия және экспорт орталығының жобаларын іске асыру мониторингі және талдау дирекциясы.

"Кәсіпорындар өздігінен жүретін ауыл шаруашылығы машиналарын, тіркеме және аспа техникаларын, жаңбырлату жабдықтарын, терең қопсытқыштарды және басқа да техникаларды шығара бастады. Өнімнің басым бөлігі елдің ішкі қажеттіліктеріне бағытталған", - деп атап өтті QazIndustry-да.

Осы кәсіпорындар толық жобалық қуатқа шыққан кезде өндірілген өнім көлемі 107,3 млрд теңгеге жетеді.

Бұдан басқа, қазіргі уақытта жалпы құны 18,4 млрд теңгені құрайтын тағы бес жоба іске асырылу сатысында тұр. Комбайндар, тракторлар, ауыр тырмалар, астық тасығыштар және т.б. өндіру жоспарлануда. Шығарылатын өнімнің көп бөлігі ішкі нарыққа бағытталатын болады.

"Келешекте құны шамамен 2 млрд теңге болатын тағы екі жоба пысықталуда. Отандық инвесторлармен бірлесіп ауыл шаруашылығы техникасының әртүрлі түрлерін өндіруді, сондай-ақ жөндеу және қызмет көрсету бойынша сервистік орталықты іске қосу жоспарлануда", - деп нақтылады QazIndustry-да.