Түркістандық фермерлерге суармалы су тарифі төмендетілді

Ағымдағы жылдың басында аграрлардың өтініші бойынша су ресурстары және ирригация министрі Нұржан Нұржігітов "Қазсушар" филиалдарына фермерлермен делдалдарсыз тікелей шарттар жасасуды тапсырды. Нәтижесінде Түркістан облысының шаруалары үшін суармалы судың бағасы биыл 38% - ға дейін төмендеді. Бұл туралы ҚР Су ресурстары және ирригация министрлігінің баспасөз қызметі хабарлады.

"Егер бұған дейін топырақты жууға арналған судың құны 1 гектар үшін 6 мыңнан 7 мың теңгеге дейін болса, биыл ол 1 гектар үшін 4282 теңгені құрайды. Осылайша, Түркістан облысының шаруалары үшін суармалы су құнының төмендеуі орта есеппен 28%-дан 38%-ға дейін құрады", - деп хабарлады ведомстводан.

Баспасөз қызметінің мәліметінше, биыл Түркістан облысы бойынша "Қазсушар" филиалы аграрлармен су беру туралы 6160 шарт жасасқан. Мақтаарал және Жетісай аудандары бойынша 111,1 мың гектар алқапқа 2825 шарт, Шардара ауданы бойынша – 41,3 мың гектар егіс алқабын суаруға 1280 шарт жасалды.

"Осы жылдан бастап еліміздің оңтүстігіндегі бірқатар фермерлер үшін суармалы су беру қызметтерінің құны төмендеді. Суармалы кезеңге дайындық үшін "Қазсушар" тұтынушылармен тікелей шарттар жасасуда, бұл делдалдарды алып тастауға мүмкіндік береді. Тиісінше, қызметтердің құны да арзандауда. Жалпы, "Қазсушар" суару кезеңінде 19 мыңнан астам аграрлармен су беру туралы шарттарға қол қоюды жоспарлап отыр", – деп атап өтті су ресурстары және ирригация министрі Нұржан Нұржігітов.