Батыс Қазақстан облысында мақсатына сай пайдаланылмаған 12 мың гектардан астам ауыл шаруашылығы жерлері тәркіленді. Бұл туралы облыстық прокуратураның баспасөз қызметі хабарлады.
Ведомствоның мәліметінше, Шыңғырлау ауданының прокуратурасы жер заңнамасының сақталуына талдау жүргізу кезінде шаруа қожалықтарының жерді нысаналы мақсаты бойынша пайдаланбау фактілерін анықтаған. Осыған байланысты жергілікті атқарушы органға ұсыныс енгізілді.
"Қадағалау актілері бойынша мемлекетке жалпы ауданы 12 234 га ауыл шаруашылығы мақсатындағы 231 млн теңгеге 22 жер учаскесі қайтарылды. Алдағы уақытта жер учаскелері оны тиімді пайдалану үшін күтіп отырған тұлғаларға берілетін болады", - деп хабарлады прокуратура.
Естеріңізге сала кетейік, жалпы Қазақстан бойынша 2022 жылдан бастап 10 млн га пайдаланылмаған немесе бұзылған ауыл шаруашылығы жерлері, жайылымдардың басым бөлігі мемлекет меншігіне қайтарылды. Ағымдағы жылы ұтымды пайдаланылмайтын тағы 2 млн гектарға жуық жер алынуы мүмкін.
