UBM Group Қазақстанда құрама жем зауыттарының құрылысына $83 млн инвестиция салады

Венгриялық UBM Group компаниясы Қазақстанда құрама жем және премикс өндіру бойынша жобаларды іске асыруға ниетті. Бұған дейін бұл туралы негіздемелік келісім ҚР президенті Қасым-Жомарт Тоқаевтың Будапештке сапары барысында жасалған болатын. Келісімнің іске асырылу егжей-тегжейін ауыл шаруашылығы министрі Айдарбек Сапаров UBM Group директорлар кеңесінің төрағасы Акош Варгамен кездесуде талқылады, деп хабарлады Қазақстан ауыл шаруашылығы министрлігінің баспасөз қызметінен.

Ведомствоның мәліметінше, 2025-2028 жылдар аралығында компания Қостанай, Ақмола және Түркістан облыстарында құрама жем өндіретін үш зауыттың, сондай-ақ Алматы облысында премикс өндіретін зауыттың құрылысына шамамен $83 млн инвестиция салуды жоспарлап отыр.

Айдарбек Сапаров Министрлік жобаларды іске асыруға толық көмек көрсететінін атап өтті.

Кездесуге Венгрияның Қазақстандағы Төтенше және Өкілетті Елшісі Отто Иван Рона және UBM Group компаниясының өкілдері қатысты. Қатысушылар осы бағыттағы бірлескен күш-жігер елдер арасындағы сауда-экономикалық ынтымақтастықты кеңейтуге жаңа серпін беретініне сенім білдірді.