Ауыл шаруашылығы министрі Айдарбек Сапаров президентке аграрлық саланы дамытудың 9 айдағы қорытындылары туралы баяндама ұсынды. Министрдің мәліметінше, бүгінде алаңдардың 98%-ы жиналды, 25,2 млн тонна астық бастырылды. Орташа өнімділік 15,5 ц/га құрады. Бұл туралы Ақорданың баспасөз қызметі хабарлады.
Сондай-ақ, Айдарбек Сапаров аграрлар рекордтық 1,2 млн тонна қант қызылшасын, сондай-ақ жемшөп дақылдарының жақсы өнімін жинауды жоспарлап отырғанын айтты.
Президенттің тапсырмасына сәйкес егіс және егін жинау жұмыстарын қаржыландыруды ұлғайту жұмыстары жүргізілуде. Биыл бұл мақсаттарға алғаш рет фермерлерге 5% субсидиясыз 580 млрд теңге бөлінді, бұл өткен жылдың деңгейінен үш есе жоғары. Айдарбек Сапаровтың айтуынша, 2025 жылы бұл соманы 900 млрд теңгеге дейін ұлғайту жоспарлануда, оның ішінде 200 млрд теңге ауыл шаруашылығы техникасының жеңілдетілген лизингіне бөлінетін болады.
Бұл ретте пайызы төмен несиелерді тиімді пайдалану, сыбайлас жемқорлық тәуекелдерін азайту үшін мемлекеттік қолдау тетіктеріне өзгерістер енгізілді.
Сонымен қатар, Қасым-Жомарт Тоқаев ағымдағы жылдың 9 айында 796 мың тоннадан астам ет өндіріліп, өткен жылдың сәйкес кезеңімен салыстырғанда 4,5%-ға өскені туралы хабардар етілді. Сүт өндірісі 4,2%-ға артып, 2,8 млн тоннаны құрады.
Қайта өңдеуді дамытудың 2028 жылға дейінгі кешенді жоспарын іске асыру шеңберінде кәсіпорындардың жүктемесін ұлғайту және отандық кәсіпорындардың өнімдері үшін өткізу нарықтарын кеңейту жөнінде шаралар қабылдануда. Сүт, ет, күнбағыс, күріш, жүгері және қарақұмық өңдеу үлесін 70%-ға дейін жеткізу жоспарлануда.
Мемлекет басшысына 2025 жылға арналған жоспарлар да ұсынылды. Министр баяндағандай, суды көп қажет ететін және монодақылдарды қысқарту, жоғары рентабельді және басым дақылдар алқаптарын ұлғайту есебінен егістерді жеделдетіп әртараптандыру жөніндегі жұмыс жалғастырылатын болады.
Соңында Қасым-Жомарт Тоқаев министрдің алдына АӨК-ні одан әрі дамыту және азық-түлік қауіпсіздігін қамтамасыз ету бойынша бірқатар міндеттер қойды.
