Бараев атындағы АШҒӨО ғалымдары фермерлерге өнімділікті арттыруға көмектеседі

А. Бараев атындағы Астық шаруашылығының ғылыми-өндірістік орталығы "Инновациялық тәжірибені тарату және енгізу жөніндегі қызметтер" бағдарламасын іске асыра бастады. Жоба аясында Ақмола облысының алты шаруашылығында өсімдік шаруашылығында инновациялық тәжірибе енгізіледі. Бұл туралы АШҒӨО- да хабарлады.

Жоба облыстық ауыл шаруашылығы басқармасының тапсырысы бойынша жүзеге асырылуда. Оның мақсаты - Ақмола облысының элиталық-тұқым шаруашылығы, тұқым шаруашылығы, шаруа қожалықтарында өсімдік шаруашылығы өнімдерінің тұрақты өндірісін қарқындату.

Өнімділікті 10-15%-ға арттыру өңірдің топырақ-климаттық әлеуетін тиімді пайдалануға, өсірудің инновациялық технологияларына және ауыл шаруашылығы дақылдарының перспективалы сұрыптарын пайдалануға негізделетін болады.

"Бүгінгі таңда А.И. Бараев атындағы астық шаруашылығы ҒӨО ғалымдары пилоттық алқаптардың тарихына, агроөнеркәсіптік кешеннің іріктелген алты субъектісінің жай-күйі мен техникалық қамтамасыз етілуіне, топырақ-климаттық, жер, материалдық-техникалық жағдайларына талдау жүргізді. Алғашқы тәжірибелік консультациялар беріліп, шаруашылықтарға оқыту семинарлары өткізілді", - деп хабарлады АШҒӨО-да.

Сондай-ақ ағымдағы жылы жалпы ауданы 2600 гектардан асатын пилоттық алқаптар базасында әртүрлі топырақ-климаттық жағдайларда Ақмола облысының фермерлері арасында алынған тәжірибені тарата отырып, демонстрациялық учаскелер орналастырылатын болады.