Арзандатылған дизель отыны фермерлерге 204 теңгеден/литрі жеткізіледі

Фермерлер үшін арзандатылған дизель отыны толық көлемде бөлінеді және оның бағасы көктемгі егіс жұмыстары аяқталғанға дейін өзгеріссіз қалады. Бұл туралы primeminister.kz хабарлайды.

ҚР премьер-министрі Әлихан Смайыловтың айтуынша, Қазақстан өңірлеріне 413 мың тонна арзандатылған дизель отыны бөлінген: бір жыл бұрынғыға қарағанда 13 мың тоннаға артық. Көктемгі дала жұмыстарын жүргізу үшін бекітілген көлем басым тәртіппен жөнелтіледі.

"Көктемгі егіс жұмыстары аяқталғанға дейін фермерлер үшін дизель отынының бағасы өзгермейтініне сендіре аламын. Операторлардың шығыстарын ескере отырып, республика бойынша орташа құны литріне 204 теңгені құрайды. Бұл ішкі нарықтағы қазіргі бағадан 15-20% төмен", - деді үкімет басшысы.

Сонымен қатар, үкімет өңірлердің әкімдіктерімен бірлесіп арзандатылған отынды ауыл шаруашылығы өндірушілеріне жеткізу бойынша бақылау шараларын күшейтеді.

"Біз арзандатылған дизель отынының қажетті көлемін бөлудеміз. Бірақ кейбір операторлар арзандатылған дизель отынын барлық фермерлерге жеткізу бойынша өз міндеттемелерін толық орындамайды. Біз қазір мониторингті күшейтеміз, барлық фактілерді тексереміз және жосықсыз операторларды жауапқа тартамыз. Болашақта біз олармен жұмыс істемейміз", - деп сендірді Әлихан Смайылов.

Ол сондай-ақ ЖЖМ бағасын көтеру оңай емес, бірақ мәжбүрлі шешім екенін айтты. Егер қазір бұл жасалмаса, онда жақын арада Қазақстан отын тапшылығына тап болады, өйткені ол бағалардың диспаритетіне байланысты көрші елдерге әкетіледі.

Өткен жылы дизель отынының рекордтық көлемі – 5,2 млн тонна өндірілді. Жалпы, соңғы бес жылда бензин өндірісі 70% – ға, дизель отыны 33% - ға өсті. Наурызда ЖЖМ тұтыну өткен жылдың сәйкес айымен салыстырғанда 15% - ға өсті. Егер баға диспаритетін қысқартпаса, биылғы жылы Қазақстан 850 мың тоннаға дейінгі көлемде тапшылыққа тап болуы мүмкін.