Облыста осы маусымда 12,6 мың гектар қант қызылшасы егілді - бұл 2023 жылмен салыстырғанда 2,6 мың гектарға артық. 2026 жылға қарай егіс алқаптарын 15 мың гектарға дейін жеткізу жоспарлануда, бұл 2022 жылғы көрсеткіштен 3,6 есе артық. Бұл туралы ҚР премьер-министрінің баспасөз қызметі хабарлады.
Үкімет бүгінде қант қызылшасы ең жоғары маржиналды дақылдардың біріне айналғанын атап өтті.
Вице-премьер Серік Жұманғарин Жетісу облысына жұмыс сапары аясында егіс науқанының қорытындыларымен танысты. Өңірде 432,5 мың га жаздық дақылдар егілді, оның ішінде 309,3 мың га – дәнді дақылдар, 90,4 мың га – майлы дақылдар, 12,6 мың га – қант қызылшасы. Жоспар бойынша қант қызылшасының өнімі 550 мың тоннаны құрайды (2023 жылы – 370 мың тонна).
Серік Жұманғарин қант қызылшасы себілген "Хильниченко және К" коммандиттік серіктестігінің (КС) алқаптарын тексерді. Шаруашылықта өңделетін жерлердің жалпы ауданы -11 мың га, оның ішінде 264 га – суармалы учаскелер. Негізгі дақылдар: қант қызылшасы, соя, дәнді және жемшөп дақылдары. КС Басқарма төрағасының орынбасары Александр Хильниченконың айтуынша, мемлекеттің қолдауының арқасында олар қызылша саласын іс жүзінде қайта жандандыра алды.
"Өткен жылы облыс бойынша орташа өнім гектарына 450 центнер қант қызылшасы болды, біздің шаруашылықта өнімділік гектарына 700 центнерді құрады. Биыл біздің шаруашылық қант қызылшасының егіс алқабын тағы 100 гектарға ұлғайтты. Біз өткен жылдан кем емес өнім аламыз деп күтеміз", – дейді фермер.
Сондай-ақ, егістіктерде Серік Жұманғарин өңірдің фермерлерімен кездесіп, оларға қант қызылшасын өндіруді қолдауды қоса алғанда, ауыл шаруашылығындағы мемлекетті қолдау шаралары туралы айтып берді.
"Бүгінде қызылша өсіру өте тиімді. Өткен жылы біз қант қызылшасы тұқымын субсидиялау нормативтерін және өңдеуге тапсырылған қызылша көлемі үшін килограмына 15 теңгеден 25 теңгеге дейін арттырдық. Зауыттар сатып алу бағасын 15 теңгеге дейін көтерді. Осылайша, бір тонна қант қызылшасының жалпы құны 40 мың теңгені құрады. Гектарына 500 центнер өнімділікпен фермердің табысы шамамен 2 млн теңгені құрайды. Енді қызылша - ең жоғары маржиналды дақыл", - деп атап өтті вице-премьер.
Кездесуде фермерлердің бірі сояның төмен сатып алу бағасы мәселесін көтерді. Оның айтуынша, 10 жыл бойы соя бір кг үшін 180 теңгеден қабылданды, бұл ретте трактордың құны 4 млн теңгені құрады. Қазір сояның сатып алу бағасы бірдей, ал тракторлардың құны бірнеше есе қымбат. Осы жағдайда фермерлерге экспорттық нарықтарға шығуға жәрдемдесу көмектеседі.
Серік Жұманғарин Сауда және интеграция министрлігіне Ауыл шаруашылығы министрлігімен бірлесіп Қытайға соя экспортының мүмкіндіктерін пысықтауды тапсырды.
