Ақмола облысында 2024 жылы инвестициялық несиелеу бағдарламасы аясында жалпы сыйымдылығы 5,4 мың бас ІҚМ болатын бес ірі сүт-тауар фермасы пайдалануға берілді. Бұл сүт өндірісін 40 мың тоннаға ұлғайтуға мүмкіндік береді. Ағымдағы жылы 1,2 мың басқа арналған тағы екі СТФ құрылысын аяқтау жоспарлануда, деп хабарлады Ауыл шаруашылығы және жер қатынастары басқармасынан.
Ақмола облысы құс етін өндіру бойынша жетекші орынды – жылына 125 мың тонна (республикалық көлемнің 28%) және тауық жұмыртқасын – 690 млн дана (16%) сақтап тұр.
Сондай-ақ, ауыл шаруашылығы өнімдерін қайта өңдеу белсенді дамып келеді: өңірде өткен жылы 252 млрд теңгеге өнім шығарған 67 қайта өңдеу кәсіпорны жұмыс істейді. Сүт, өсімдік майы және ұн өндірісі айтарлықтай өсті.
Астананың айналасында азық-түлік белдеуін қалыптастыруға ерекше көңіл бөлінуде. Аймақ Астананы 30%-дан астам ет және сүт өнімдерімен, сондай-ақ 80% тағамдық жұмыртқамен қамтамасыз етеді. Шамамен 2 млн адам тұратын агломерация халқының өсуі Ақмола облысын азық-түліктің негізгі жеткізушісі етеді.
2024 жылы өңірдің агросекторын мемлекеттік қолдау 140 млрд теңгені құрады, оның ішінде 46,4 млрд теңге субсидиялар мен 93,5 млрд теңге жеңілдікті несиелер. Қазір жаңа егіс маусымына белсенді дайындық жүргізілуде: 540,2 мың тонна тұқым дайындалды, 800 мың га сүрі жер өңделді, ал ауыл шаруашылығы техникасының дайындығы 80%-дан асады.
