Астанада аграрлық индустриялық аймақ пайда болады

Астанада қаланың тамақ өнеркәсібінің әлеуетін арттыру мақсатында аграрлық индустриялық аймақ құрылатын болады. Бұл туралы қалалық Инвестициялар және кәсіпкерлікті дамыту басқармасы басшысының орынбасары Мақсат Жаңабаев коммуникациялар қызметінің брифингінде мәлімдеді.

"Қажетті инженерлік инфрақұрылымы бар аграрлық индустриялық аймақ құру жоспарлануда. Бүгінгі таңда ауданы 67 га жер учаскесі анықталды", - деді Мақсат Жаңабаев.

Ол қалада азық-түлік қауіпсіздігін нығайту бойынша жүйелі жұмыс жалғасатынын атап өтті. Сауда-логистикалық инфрақұрылым мен тамақ өнеркәсібін дамытуға ерекше көңіл бөлінуде. Қазіргі уақытта бұл бағыт жалпы құны 79 млрд теңгені құрайтын 20 жобаны қамтиды.

Сондай-ақ, Астанада жалпы инвестиция сомасы 17,3 млрд теңгені құрайтын тамақ өнеркәсібі саласындағы жеті жоба жүзеге асырылуда. Бұдан басқа, инвестиция сомасы 15 млрд теңгені құрайтын қуаттылығы жылына 7 мың тонна өнім шығаратын жылыжай кешені салынуда.

Бұдан басқа, елордада фермерлер базарының құрылысы жүргізілуде, онда тауарлар "өріс-сөре" қағидаты бойынша сатылатын болады. Сауда орындары өнімді төмендетілген бағамен сату үшін өндірушілерге беріледі деп жоспарлануда. Фермерлер нарығын пайдалануға беру 2025 жылдың қаңтарына жоспарланған.