Қандай жағдайларда фермерден жерді алып қоюы мүмкін

ҚР Жер кодексі шаруа немесе фермер қожалығын, ауыл шаруашылығы өндірісін жүргізуге арналған жер учаскесін, егер ол осындай факт алғаш анықталған кезден бастап бір жыл ішінде мақсатына сай пайдаланылмаған жағдайда алып қоюды көздейді. Ақмола облысының Ауыл шаруашылығы және жер қатынастары басқармасында жер заңнамасының ерекшелігі түсіндірілді.

Жер учаскесін пайдаланбау фактісі анықталған сәт жер пайдаланушыға бұзушылықтарды жою туралы нұсқама берілген күн болып есептеледі. Бұл ретте жер учаскесін еңсерілмейтін күштің салдарынан мақсаты бойынша пайдалануға болмайтын уақыт пайдаланылмайтын кезеңге қосылмайды.

Жер учаскесі келесі жағдайларда пайдаланылмайтын болып есептеледі:

1. егістікте - ауыл шаруашылығы дақылдарын егу үшін жер учаскесін өңдеу жөніндегі жұмыстарды жүргізбеу;
2. шабындықтарда - жер учаскесінде шөп шабуды жүргізбеу, оның арамшөптермен, бұталармен, ұсақ ормандармен толып кетуі және шөптің тозуының өзге де белгілерінің болуы;
3. жайылымдарда - жайылымға арналған ауыл шаруашылығы жануарларының болмауы не олардың агроөнеркәсіптік кешенді дамыту саласындағы уәкілетті орган белгілеген жайылымдардың жалпы алаңына жүктеменің шекті жол берілетін нормасының 50%-нан аз мөлшерінде болуы және (немесе) жем дайындау мақсатында шөп шабудың болмауы;
4. көпжылдық екпелерде - есептен шығарылған көпжылдық екпелерді күтіп-баптау, жинау және тазартып тегістеу жұмыстарын жүргізбеу.

Жер кодексінің 92 және 93-баптарында көзделген меншік иелері мен жер пайдаланушылардан жер учаскелерін мәжбүрлеп алып қою жер учаскесінің орналасқан жері бойынша жердің пайдаланылуы мен қорғалуына мемлекеттік бақылауды жүзеге асыратын органдардың талап қоюы бойынша сот тәртібімен жүргізіледі.