Қарағанды облысында құрғақшылыққа байланысты 6,3 мың га дақыл есептен шығарылды

Қарағанды облысында жекелеген аудандарда егін жинау жұмыстары жүргізілуде, қыркүйек айында жаппай егін жинауға кіріседі. Барлығы 994 мың гектар алқапта астық жинау керек. Сонымен қатар, майлы дақылдар, картоп және көкөністер жиналады. Бұл туралы облыс әкімінің баспасөз қызметі хабарлады.

"Бүгінгі таңда дәнді дақылдардың негізгі жағдайы жақсы. Өсімдіктердің опат болуына байланысты 6,3 мың га есептен шығарылды. Жалпы дәнді дақылдарды жинау алаңы 994 мың га құрайды, оның ішінде бидай – 813,4 мың га. Алдын ала деректер бойынша орташа өнімділік 9,5 ц/га болған кезде астықтың жалпы түсімі 940,4 мың тонна көлемінде күтіледі", – деді Ауыл шаруашылығы басқармасы басшысының м.а. Сырым Бошпанов әкімдіктегі аппараттық кеңесте.

Бүгін Абай, Бұқар Жырау және Шет аудандарының жекелеген шаруашылықтары егін жинау жұмыстарына кірісті. Қыркүйек айында жаппай жинау басталады.

Егістіктерге 2095 астық жинайтын комбайн тартылады. Техника дайын. Ауыл шаруашылығы өндірушілеріне арзандатылған дизель отыны бөлінеді. Өңірдің шаруашылықтарында 546 астық қоймасы бар. Астық қабылдағыштар да дайын.

Баспасөз қызметінің мәліметінше, майлы дақылдар 29,6 мың гектар алқапқа, картоп 11,6 мың гектарға, көкөністер 1 321 гектарға жиналады. Картоптың жалпы жиналуы 300,2 мың тонна көлемінде күтілуде.

Сондай-ақ, болжам бойынша, жемшөп дайындау қамтамасыз етіледі. Шабындықтар үшін фермерлерге мемлекеттік және орман қорының жерлері бөлінеді.