Қазақстан мен Франция асыл тұқымды ұсақ малды әкелуге ветеринариялық сертификаттарды келісу бойынша келіссөздер жүргізуде. Өткен аптада бұл мәселе ҚР АШМ Ветеринариялық бақылау және қадағалау комитеті өкілдерінің Франция Елшілігінің өкілдерімен кездесуінде талқыланды. Бұл туралы Комитет хабарлады.
Францияның Ресей Федерациясындағы Елшілігі жанындағы аймақтық экономикалық қызметтің Қазақстан бойынша ауыл шаруашылығы санитарлық және фитосанитарлық мәселелер жөніндегі кеңесшісі Амос Мари-Аньестің айтуынша, екі елдің бизнесі Франциядан асыл тұқымды қойларды жеткізуге мүдделі. Алайда, Қазақстан мен Франция арасында тауарлардың осы түріне келісілген екіжақты сертификаттар жоқ. Осыған байланысты француз тарапы Франциядан Қазақстанға тірі ұсақ мал әкелуге дайындалған ветеринариялық сертификат нысанын ұсынды.
Талқылау қорытындысы бойынша француз тарапына Еуразиялық экономикалық одақтың кедендік аумағына экспортталатын қой мен ешкіге ветеринариялық сертификаттың №5 нысанын қолдану не болмаса Қазақстан аумағына ұсақ малды әкелу үшін бекітілген нысанды пайдалану ұсынылды.
Тараптар ветеринария саласындағы ынтымақтастық мәселелерін шешу қажеттілігі бойынша екіжақты кездесулер өткізу туралы келісімге келді.
