Қазақстанда мал биржасы салынады

Қазақстанда мал шаруашылығында австралиялық тәжірибені енгізу шеңберінде таяудағы екі жылда 98 мың ІҚМ арналған алты бордақылау алаңын, 50 мың бас ІҚМ арналған ірі бордақылау кешенін және алғашқы мамандандырылған мал биржасын салу жоспарлануда. Бұл туралы Ауыл шаруашылығы министрлігінің баспасөз қызметі хабарлады.

Осы бағдарламаны іске асыруға байланысты жемшөп өндірісінің жол картасы өзектендірілді.

Ауыл шаруашылығы министрлігінің алқасында вице-министр Аманғали Бердалин хабарлағандай, 2024 жылы мал шаруашылығының жалпы өнімін өндіру көлемі 3,6% өсіммен 3,3 трлн теңгені құрады. 4,3% өсіммен барлық түрдегі 1,2 млн тонна ет, 4,4% өсіммен 3,6 млн тонна сүт өндірілді.

Бұл көлемдер ішкі қажеттілікті толық қамтамасыз етуге, сондай-ақ экспорт көлемін ұлғайтуға мүмкіндік береді. Мәселен, өткен жылы 22,1 мың тоннадан астам сиыр еті (өсімі 1,5 есе), 17,6 мың тонна қой еті (өсімі - 2,2 есе) экспортталды.

АШМ деректері бойынша 2025 жылы Қазақстанда өндіріс көлемі 139,5 мың тонна болатын СТФ құрылысы бойынша кемінде 30 жоба іске асырылатын болады. Бұл фермаларды 2026-2027 жылдары пайдалануға беру жоспарланып отыр.

Сонымен қатар, елімізде ветеринариялық инфрақұрылым құру қажет.

"Биыл ауыл шаруашылығы жануарларының өнімділігін арттыруға және мал шаруашылығы өнімдерінің экспортын ұлғайтуға бағытталған шаралар кешені іске асырылатын болады. Осы мақсаттарға жетудің маңызды шарты ветеринариялық инфрақұрылымды дамыту болып табылады. Ветеринариялық нысандарды салу бойынша индикативтік жоспарлардың орындалуы дабыл қағуда", - деді Ауыл шаруашылығы министрі Айдарбек Сапаров өңірлердің осы бағыттағы жұмысына наразылығын білдіріп.