Қазақстанда органикалық өнім туралы заң қабылданды

Қазақстан президенті Қасым-Жомарт Тоқаев "Органикалық өнім өндіру және оның айналымы туралы" Заңға қол қойды. Заң табиғи ресурстарды сақтау мен ұтымды пайдалануға, дұрыс тамақтануды қалыптастыруға және органикалық өнімдер нарығын дамытуға бағытталған. Бұл туралы Ақорданың баспасөз қызметі хабарлады.

Заңда бірқатар жаңа ережелер қарастырылған. Біріншіден, органикалық өнім өндірісі мен айналымы саласындағы ұлттық заңнаманың мақсаттары мен міндеттері қайта қаралды.

Екіншіден, органикалық өнім өндірушілердің ауқымы кеңейтілді, ол жеке және заңды тұлғалардан басқа, органикалық өнім өндірушілерді осындай бірлестіктерге (қарапайым серіктестіктерге) жатқызуға мүмкіндік береді.

Үшіншіден, органикалық өнім өндірісіне көшу шарттары көзделген, оны өндіруге, таңбалауға және айналымға қойылатын талаптар белгіленген.

Сондай-ақ, органикалық өнім өндіру саласындағы халықаралық тәжірибелер мен стандарттарға сәйкес келу мақсатында өндірілген өнімнің сапасы үшін ерікті қатысу, ішкі бақылау және ұжымдық жауапкершілік қағидаттарына негізделген бірлескен кепілдіктер жүйесін (PGS) қалыптастыру және оның жұмыс істеуі жөніндегі ережелер көзделген.