Қазақстанда тәлімбақтарға мемлекеттік қолдауды күшейту сұралады

Қазақстандағы отырғызу материалын өндірушілер бағбандарды сапалы көшеттермен қамтамасыз етуге дайын, алайда бұл салаға мемлекеттік қолдау қажет. Бұл туралы Ауыл шаруашылығы вице-министрі Әбілқайыр Тамабектің қатысуымен өткен Алматы облысындағы тәлімбақ және бау-бақша мәселелері жөніндегі дөңгелек үстелде аграрлар мәлімдеді.

«Тәлімбақшылар импорттық материал көбінесе қазақстандық топырақ-климаттық жағдайларға нашар бейімделгенін, қажетті иммунитеті жоқ екенін және оның өмір сүру уақыты шектеулі екенін атап өтті. Осыған байланысты жергілікті тәлімбақтарға көбірек көңіл бөлу керек. Сала жеткілікті капиталды қажет етеді, өтелу мерзімі ұзақ. Сондықтан мамандар мемлекеттік қолдау шараларын, атап айтқанда түпнұсқа тұқым өндірушілерді субсидиялауды жетілдіруді сұрайды»,-деп хабарлады Ауыл шаруашылығы министрлігінің баспасөз қызметі.

Бұдан басқа, аграрлардан аналық-қалемше бақтарды күтіп ұстау бойынша шығындарды өтеу тетігін енгізуді, сондай-ақ импорттық отырғызу материалын субсидиялау үлесінің пайызын азайтуды сұрайды.

Сала қызметкерлерінің пікірінше, тағы бір мәселе-білікті кадрларды даярлау мәселесі. Шаруашылықтарға өнеркәсіптік бау-бақша және тәлімбақтардың заманауи технологияларымен жұмыс істеу дағдылары бар білікті агроном мамандар қажет.

Әбілхайыр Тамабек өз кезегінде мемлекеттік қолдаудың қолданыстағы тетіктері туралы айтып берді. Атап айтқанда, фермерлер бақшаларды салу, жеміс-жидек қоймаларын салу кезінде инвестициялық субсидиялар, техниканы сатып алуға несиелер мен лизинг бойынша сыйақы мөлшерлемелерін субсидиялар, сондай-ақ элиталық көшеттерді, тыңайтқыштарды, өсімдіктерді қорғау құралдарын және т. б. сатып алуға субсидиялар ала алады.

Талқылау қорытындысы бойынша АШМ-ге қарау үшін жіберілген қарар қалыптастырылды. Сала сарапшылары ұсынылған шаралар шетелдік жеткізушілермен бәсекеге қабілетті күшті тәлімбақтар мен бау-бақша шаруашылығының қалыптасуына көмектесетініне сенімді.