2024 жылы Қазақстанда өсімдік шаруашылығы өнімі өндірісінің өсуі айтарлықтай өсім көрсетті - 19,9%. Атап айтқанда, елімізде 26,7 млн тонна астық бастырылды. Бұл туралы үкіметтің баспасөз қызметі хабарлады.
ҚР Ауыл шаруашылығы вице-министрі Азат Сұлтанов Үкімет отырысында 11 айда ауыл шаруашылығының жалпы өнімінің көлемі 11,6% жылдық жоспармен 13,4%-ға артып, 7,8 трлн теңгені құрағанын хабарлады.
"Өсімдік шаруашылығында орташа өнімділігі 16,1 ц/га болғанда 26,7 млн тонна астық, оның ішінде бидай – 19,8 млн тонна, күріш – 563 мың тонна бастырылды. Сондай-ақ 2,9 млн тонна картоп, 3,9 млн тонна көкөніс, 3,2 млн тонна майлы дақылдар және 300 мың тонна мақта жиналды. Мал шаруашылығында сою салмағындағы ет өндірісінің 4%-ға, сиыр сүтінің 4,4%-ға және тауық жұмыртқасының 1,2%-ға өсуі байқалды", - деп нақтылады Азат Сұлтанов.
Азық-түлік өндірісі 11 айда 2,1%-ға өсіп, 3 трлн теңгені құрады. Оның ішінде импортқа тәуелді өнімдер - ірімшік пен сүзбе өндірісі 8,7%-ға, шұжық өнімдері - 4,1%-ға, сары май - 2,9%-ға өсуде. Өсімдік майының өндірісі 12%-ға өсті.
"Жыл соңына дейін осы саладағы өсімді дәнді, майлы дақылдарды өңдеу және қант өндіру есебінен көріп отырмыз. Сала дамуының өсу қарқынын төмендетуге жол бермеу мақсатында келесі жылы көктемгі егіс және егін жинау жұмыстарын қаржыландыру көлемі 700 млрд теңгеге дейін, ауыл шаруашылығы техникасының жеңілдікті лизингі 200 млрд теңгеге дейін жеткізілетін болады. 1,9 млн тонна минералды тыңайтқыштар енгізу және элиталық тұқымдардың үлесін 10,5%-ға дейін арттыру жоспарлануда", - деп толықтырды Азат Сұлтанов.
