Қазақстанда отандық тыңайтқыштар бойынша субсидиялау нормативін 10% - дан 60% - ға дейін ұлғайту жоспарлануда. Бұл туралы baibolsyn.kz ҚР Ауыл шаруашылығы министрлігінің баспасөз қызметіне сілтеме жасай отырып хабарлайды.
«Ауыл шаруашылығы министрлігінің отандық тыңайтқыштарды аванстық субсидиялау жөніндегі бұйрығы келісудің соңғы сатысында тұр. Отандық тыңайтқыштарды субсидиялау нормативін 10%-ға 60% деңйіне дейін арттыру жоспарлануда», — деді Ауыл шаруашылығы министрлігі алқасының отырысы барысында ведомство басшысы Айдарбек Сапаров.
Сондай-ақ, АШМ басшысы Айдарбек Сапаров әлемдік тәжірибе климаттық тәуекелдерге тәуелділікті төмендету үшін агротехнологиялардың маңыздылығын дәлелдейтінін хабарлады.
«Сонымен бірге Қазақстанда агротехнологияларды енгізу бойынша жүйелі жұмыс жүргізілмейді. Минералды тыңайтқыштар өте аз қолданылады, сапалы тұқымдар пайдаланылмайды. Нашар, қағаз жүзінде көбірек, ауыл шаруашылығы дақылдарының егіс алқаптарын әртараптандыру жүргізілуде. Техниканы жаңарту тиісті деңгейде жүріп жатқан жоқ», — деді министр Ауыл шаруашылығы министрлігінің кеңейтілген алқа отырысында.
2024 жылы шамамен 1,5 млн тонна тыңайтқыш енгізу жоспарланған, бұл 2023 жылы енгізілгеннен 2,2 есе көп (679 мың тонна). Осы көлемнің 60% Қазақстанда өндірілетін тыңайтқыштардың 2 түріне, атап айтқанда аммиак селитрасы мен аммофосқа тиесілі. Облыс әкімдіктеріне тыңайтқыштарды өндірушілермен жеткізу мәселелерін пысықтау тапсырылды.
Сондай-ақ, Айдарбек Сапаров Президенттің тапсырмасы бойынша егінді әртараптандыру жұмыстары күшейтілетінін айтты. Осыған байланысты 2024 жылы бидай алқаптары 440 мың гектарға азаяды деп күтілуде, бірақ бұл ретте астық алқаптарын қысқарту есебінен жоғары рентабельді басым дақылдар алқаптары ұлғаятын болады. Мәселен, майлы дақылдар алаңын 415 мың гектарға, жемшөп алаңын 96 мың гектарға ұлғайту жоспарлануда.
«Мақта сияқты ылғал көп қажет ететін дақылдар алқабы 16 мың гектарға, күріш алқабы 6 мың гектарға қысқарады деп күтілуде. Сондай-ақ, өңдеу кәсіпорындарының қуаттылығы мен нарық конъюнктурасын ескере отырып, үстіміздегі жылдың өзінде Алматы облысы мен Жетісу облысында жүгері алқаптарын 15 мың гектарға қысқарту бойынша жұмыс жүргізу қажет. Көкөніс дақылдарының 14,6 мың гектарға өсуі болжануда», — деді Айдарбек Сапаров.
Облыс әкімдіктеріне бұл мәселені бақылауда ұстау және әртараптандыру, сондай-ақ ауыспалы егістерді сақтау қажеттілігін түсіндіру жұмыстарын жүргізу тапсырылғаны мәлімделеді.
