Қазақстанда 2022 жылдан бастап бұзушылықтармен берілген немесе мақсаты бойынша пайдаланылмайтын ауыл шаруашылығы мақсатындағы 12 млн га жер мемлекеттік меншікке қайтарылды. Осы көлемнің 5 млн гектарына жуығы қайта бөлінді. Бұл туралы ОКҚ брифингінде АШМ Жер ресурстарын басқару комитетінің төрағасы Мұрат Теміржанов мәлімдеді.
"Барлық мүдделі мемлекеттік органдардың үйлесімді жұмысының арқасында үш жыл ішінде ауқымды жұмыс атқарылды. 9,4 млн га алаңда 4 731 жоспардан тыс тексеру жүргізілді. 6,3 млн га аумақта бұзушылықтарды жоюға 3,5 мыңға жуық ұйғарым берілді. Нәтижесінде мемлекеттік қорға 12,1 млн гектар жер қайтарылды", - деді Мұрат Теміржанов.
Ол 2022 жылы 5,4 млн га, 2023 жылы – 4,6 млн га, 2024 жылы – 2,1 млн га тәркіленгенін атап өтті.
Қайтарылған жерлердің 4,9 млн гектары қайта бөлінді, оның 1,9 млн гектары жайылымға бөлінген, ал 3 млн гектары жер пайдаланушыларға конкурстық негізде берілген.
"Бұл шаралар жайылым тапшылығы жағдайын жақсартуға және бұрын пайдаланылмаған жерлерді айналымға тартуға мүмкіндік берді. Қайтарудан басқа, шаралар қабылданғаннан кейін жердің едәуір бөлігі ауылшаруашылық айналымына тартылды. 2022 жылдан бастап жер пайдаланушылар өздерінің бұрын пайдаланылмаған 3,7 млн га жерінде жұмыс істей бастады", - деп атап өтті Мұрта Теміржанов.
