Көкшетауда Германиядан алынатын ауыл шаруашылығы техникасына арналған сервистік орталық салынады

Ақмола облысының әкімдігі мен СТ Agro GmbH компаниясы Көкшетауда CLAAS және HORSCH неміс брендтерінің ауыл шаруашылығы техникасына сервистік қызмет көрсету бойынша заманауи сервистік орталық құрылысының инвестициялық жобасын іске асыру бойынша ынтымақтастық туралы Меморандумға қол қойды. Бұл туралы облыс әкімдігінің баспасөз қызметі хабарлады.

"Ақмола облысы - еліміздің агроөнеркәсіптік кешенінің орталығы. Әрбір екінші мамандандырылған автомобиль, астық жинайтын комбайн біздің өңірде шығарылады. Меморандумға қол қою – бұл ауыл шаруашылығы саласын одан әрі дамыту мен кеңейтуге жасалған маңызды қадам", - деді Ақмола облысы әкімінің орынбасары Ернар Жаркешов.

Сервистік орталықтың құрылысына 4 млн еуроға дейін инвестиция салу жоспарлануда. Кәсіпорында 100 жұмыс орны құрылады.

Әкімдіктің ақпараты бойынша, 2024 жылдың басынан бері өңір шетелдік инвесторлармен 327 млрд теңге сомасына алты меморандум жасасты.

ST AGRO компаниясы CLAAS неміс ауылшаруашылық өндірушісінің ресми дилері болып табылады.