Қызылорда облысында премьер-министрдің орынбасары — сауда және интеграция министрі Серік Жұманғариннің төрағалығымен әлеуметтік маңызы бар азық-түлік өнімдерінің бағасын тұрақтандыру бойынша республикалық кеңес өтті. Вице-премьердің өңірге жұмыс сапары аясында өткен бұл талқылауға орталық, облыстық мемлекеттік органдардың, сондай-ақ бизнес-қоғамдастықтың мүдделі өкілдері қатысты.
Аталған кеңесте ауыл шаруашылығы вице-министрі Ербол Тасжуреков форвардтық сатып алудың жаңа тетіктері туралы баяндады. Форвардтық шарттар жасасу мүмкіндігі үшін ауыл шаруашылығы өнімдерінің тізімін кеңейту талқыланды. Атап айтқанда, оның тізімі қарақұмық, күріш, күнбағыс майы, ұн және қант сияқты түрлермен толықтырылды.
Ауыл шаруашылығы вице-министрі Ербол Тасжүреков күзгі дақыл шикізатын сатып алу үшін қарақұмық, күріш және күнбағыс майы бойынша өңдеу кәсіпорындарын форвардтық қаржыландыруды жүзеге асыру ұсынылып отырғанын айтты. Ол ӘКК қаражаты осы мақсаттарға бағытталуы мүмкін екенін атап өтті.
«Осы бағдарламаға сауда желілерінің орнына көбірек өндірушілерді тарту және делдалдарды алып тастау үшін үлгілік қағидаларда ауыл шаруашылығы тауарын өндірушілер мен қайта өңдеу кәсіпорындарын қаржыландырудың 70% бағыты бойынша талаптар белгіленген. Осылайша, қолданыстағы мемлекеттік қолдау шараларымен қатар форвардтық сатып алу тетігі фермерлердің болашақта өндірілген өнімді жеңілдетілген қаржыландыруға және кепілдендірілген өткізуге қол жеткізуін қамтамасыз етуге мүмкіндік береді», — деп атап өтті Ербол Тасжүреков.
Айта кетейік, жыл сайын АӨК мемлекеттік қолдау көлемі артып келеді. 2023 жылы саланы субсидиялауға 400 млрд теңгеден астам қаражат жұмсалды.
Сондай-ақ, делегация вице-премьердің Қызылорда облысына сапары аясында өңірдің Агросектор объектілеріне, атап айтқанда күріш өндіретін кәсіпорындарға, наубайханалар мен су шаруашылығы объектілеріне барды.
