Көктемгі егіс жұмыстарын жүргізуге шаруаларға 257 мың тонна тыңайтқыш, оның ішінде 144 мың тонна отандық кәсіпорын өнімі жөнелтілді. Егіс науқанының барысы премьер-министрдің орынбасары Серік Жұманғариннің төрағалығымен өткен кеңесте талқыланды.
Ауыл шаруашылығы вице-министрі Әбілқайыр Тамабектің айтуынша, қазір қоймаларда 88 мың тонна тыңайтқыш қоры бар. Жалпы, ағымдағы егіс алқабында шамамен 704 мың тонна тыңайтқыш, оның ішінде қазақстандық өндірістің 63% пайдалану жоспарлануда.
Жергілікті бюджеттерде тыңайтқыштарды сатып алуды субсидиялау бағдарламасына 31,3 млрд теңге қарастырылған. Дақылдарды зиянды организмдер мен арамшөптерден қорғау үшін субсидиялау шеңберінде 32,6 млрд теңге бөлінді.
Сондай-ақ, баспасөз қызметі егіс жұмыстарын жүргізуге 419 мың тонна жеңілдетілген дизель отыны бөлінгенін хабарлады - бұл өткен жылдың деңгейінен 19 мың тоннаға артық. Операторлардың шығындарын ескере отырып, ауыл шаруашылығы өндірушілері үшін соляркының орташа құны 204 теңгені/литрі құрайды. Өңірлер жанармайдың көзделген көлемінің 47% алды.
"Кең дала" бағдарламасы бойынша егіс науқанын қаржыландыруға 140 млрд теңге қарастырылған, оған кемінде 3200 фермерді қамту, шамамен 2 млн га алқапта егіс пен егін жинауды қамтамасыз ету жоспарланған. Қазіргі уақытта 150,8 млрд теңгеге 4169 өтінім келіп түсті.
Өнімді форвардтық сатып алуға 20 млрд теңге қарастырылған. Азық-түлік корпорациясы көктемгі егіс жұмыстарын іске асыру және кейіннен қаржыландыру үшін ірі ауыл шаруашылығы өндірушілеріне тауарлық несие беруге тағы 35 млрд теңге бөледі.
Бүгінгі таңда Қазақстанның оңтүстік өңірлерінде аграрлар 832,9 мың га екті, олардың басым бөлігі дәнді, жемшөп және майлы дақылдар. Жалпы, бүкіл ел бойынша 23,4 млн га егу жоспарлануда. Биыл дәнді, жемшөп, көкөніс және бақша дақылдарының, сондай-ақ қант қызылшасының егістік алқаптары ұлғаяды.
Ауыл шаруашылығы министрлігі жанындағы барлық проблемалық мәселелерді жедел шешу үшін барлық мүдделі мемлекеттік органдар мен ұйымдарды, сондай-ақ облыстар мен қалалар әкімдерінің орынбасарларын тарта отырып, жедел штаб жұмыс істейді.
