Жер ресурстарын басқару комитетінің төрағасы Мұрат Теміржанов әлеуметтік желілерде таратылатын қазақстандық ауыл шаруашылығы жерлерінің ҚХР интернет-порталдарында сатылымға шығарылғаны туралы ақпаратты жалған деп атады.
Жер комитетінің басшысы ҚР Жер кодексінің 24-бабының талаптарына сәйкес шетелдіктер, азаматтығы жоқ адамдар, шетелдік заңды тұлғалар, шетелдік қатысуы бар ҚР заңды тұлғалары, халықаралық ұйымдар, шетелдік қатысуы бар ғылыми орталықтар, сондай-ақ қандастар ауыл шаруашылығы мақсатындағы жер учаскелерін жеке меншік немесе жер пайдалану құқығымен иелене алмайтынын еске салды.
Сондай-ақ шетелдіктермен немесе азаматтығы жоқ адамдармен некеде тұрған ҚР азаматтарына ауыл шаруашылығы жерін иеленуге және жалға алуға тыйым салынады.
"Қазақстанда әлеуметтік желіде жарияланған қытайлық сайтта жерді сату туралы ақпарат жалған....Заңдардың аталған нормаларын бұзушылықтар анықталған жағдайда соған жол берген тұлғалар жауапкершілікке тартылатынын мәлімдейміз. Бұл мәселе министрліктің тұрақты бақылауында", - деді Мұрат Теміржанов.
