Түркістан облысында ұйымдастырылған қылмыстық топ "Сыбаға" бағдарламасы бойынша ІҚМ сатып алуды субсидиялауға бюджеттен бөлінген 1,9 млрд теңгені ұрлап кетті. Қаражат жалған кепілдіктерді рәсімдеу арқылы ұрланған, деп хабарлады Қаржы мониторингі агенттігінің баспасөз қызметінен.
ҚМА деректері бойынша қылмыстық схеманы ұйымдастырушы мемлекеттік қарыздарды алуға өтінімдерді қарау жөніндегі комиссияның төрағасы болып шықты. Ол сондай-ақ қатысушылардың әрекеттерін үйлестірген. Схеманы іске асыру үшін Кентау қаласында "Яссы-кредит НС" несиелік серіктестігі" ЖШС құрылған, сондай-ақ жұмыс істемейтін "Expert Consulting Group" ЖШС атынан жүргізілген жалған құжаттар мен мүлікті бағалаудың жалған актілері пайдаланылған.
"Комиссия төрағасы әлеуетті қатысушыларды іздеп, олардың рөлдерін бөлген және жалған қарыздарды рәсімдеу процесін қадағалаған. Бұл ретте құжаттарды ресімдеу үшін жеке тұлғаларды іздеу бойынша нұсқаулар берген, ай сайынғы төлемдерді бақылап, бұрмаланған салыстырып тексеру актілерін жасауға қатысқан, ал ұрланған қаражат топ мүшелері арасында бөлінген", - деп хабарлады ҚМА.
Қазіргі уақытта қылмыстық іс аясында 27 адам күдікті деп танылды. Күдіктілердің мүлкіне жалпы сомасы 1 млрд теңгеден астам тыйым салынды.
