Қыстың қызған шағында Түркістан облысының Келес фермерлері қырыққабаттың алғашқы өнімін жинай бастады. Көкөніс Қазақстанның ірі қалаларына жіберіледі. Бұл туралы облыс әкімдігінің баспасөз қызметі хабарлады.
Фермерлер Шералы Тәжібаев күзде Біртілек ауылдық округіне 2 гектар жерге қырыққабат егіп, қазіргі уақытта 38 тонна өнім жинауда. Ақпан айында фермер тағы 100 тонна өнім жинауды жоспарлап отыр.
"Осы қыста қар аз жауды. Аяз болған жоқ. Жеңіл жабынның астына отырғызылған көкөніс көшеттері тез тамыр жайып кетті. Қырыққабаттың әр қауданының салмағы 4 келіге дейін жетеді. Егер біз қырыққабатты ертерек отырғызатын болсақ, онда сәуір мен мамырдан бастап екінші егін егеміз. Неғұрлым ерте шықсаңыз, баға соғұрлым жоғары болады", - деді Шералы Тәжібаев.
Әкімдікте Келес фермерлері жыл бойы жұмыс істейтінін, қазіргі уақытта олар қырыққабат егумен айналысатынын атап өтті. Жергілікті шаруа қожалықтары шамамен 1000 гектар жерге қырыққабат отырғызды. Маусымда үш рет егін жинау мүмкіндігі аграрлық сектор үшін тиімді.
Өткен жылы Келес ауданында 2,4 мың га қырыққабат егіліп, 35 мың тонна өнім жиналды.
