Ордабасы ауданы Шұбар ауылында 28 мың бас ірі қара мал бордақылау кешенінің құрылысы басталды. Кешеннің негізін қалау рәсіміне кооператив басшылары мен ауыл шаруашылығы саласында жұмыс істейтін 40-қа жуық кәсіпкер келді. Бұл туралы Түркістан облысы әкімінің баспасөз қызметі хабарлады.
2024 жылы іске қосылатын кешеннің жалпы ауданы 400 га құрайды. Әрбір 50-100 бас малды бордақылауға 0,12 га жер қарастырылған.
Жобаны іске асыру екі кезеңде жүзеге асырылатын болады. Біріншісінде 11 650 бас ірі қара мал бордақылау кешені іске қосылады, бұл ретте ауыл шаруашылығы өндірістік кооперативтері мен жеке өндірістер ашу көзделеді. Екінші кезеңде бордақылау кешенінің қуаты 28 350 басқа дейін ұлғайтылатын болады. Нәтижесінде 800 адам тұрақты жұмыспен қамтылатын болады.
Кешенде 50, 100, 150 және 200 басқа арналған бордақылау алаңдары құрылатын болады. Сондай-ақ, инвесторлар есебінен әкімшілік кеңсе, асхана, ветеринарлық бекет, мал союға арналған заманауи нысандар, жемшөп сақтау қоймалары және басқа да нысандар салынады. Инфрақұрылымды жүргізу бюджет есебінен жүргізіледі.
"Жалпы жоба аясында жылына 40 мың бас ірі қара мал бордақылау және 9,5 мың тонна таза ет, ал тірі салмақта - 17 920 тонна ет өндіру жоспарлануда", - деп хабарлады баспасөз қызметі.
