ҚР Парламентінің депутаттары жайылымдарды пайдалану туралы заңнамаға түзетулер енгізуге бастамашылық жасады. Бұл туралы Сенаттың баспасөз қызметі хабарлады.
Заң жобасында жер кодексіне өзгерістер көзделеді. Жергілікті атқарушы органдарға деградация мен шөлейттенуге қарсы іс-шаралар жоспарын әзірлеу және бекіту, сондай-ақ жайылымдарды суландыру бойынша өкілеттіктер беру ұсынылады.
Шалғайдағы мал шаруашылығы мен мал жаю үшін уақытша өтеусіз жер пайдалануға жер учаскелерін беру жөніндегі нормалар алып тасталады.
Сондай-ақ жайылымға қажетті ауыл шаруашылығы жануарларының санын жүктеме нормасынан 20% - дан 50% - ға дейін ұлғайту арқылы жайылымдарды пайдаланбау критерийін қатаңдату ұсынылады.
Бұдан басқа, ҚР Орман кодексіне орман және табиғат қорғау мекемелерін жыл сайын жергілікті атқарушы органдарға шөп шабу және мал жаю мүмкін болатын мемлекеттік орман қорының учаскелері туралы ақпарат беруге міндеттейтін түзету енгізіледі.
"Жайылымдар туралы" заңға ауыл халқының малын жаюға арналған елді мекеннің айналасындағы жерлердің мәртебесін күшейтуге бағытталған "қоғамдық жайылымдар" ұғымы енгізіледі.
