Батыс Қазақстанда мал өлімі орын алды

Батыс Қазақстан облысының Бөрлі ауданында мал өлімі орын алды. Қазіргі уақытта ІҚМ өлімінің себебі анықталуда. Бұл туралы АШМ Ветеринарлық бақылау және қадағалау комитетінде хабарлады.

"Аумақтық инспекцияның ақпараты бойынша, Қарағанды ауылдық округіндегі ауылда жеті бас ІҚМ өлімі анықталды", - деп хабарлады Комитетте.

Оқиғаға байланысты ауылға Батыс Қазақстан облыстық аумақтық инспекциясының басшысы, БҚО ветеринария басқармасының басшысы, аудандық ветеринариялық станция директоры келді.

"Мамандар 31 қазан мен 2 қарашада өлген төрт ірі қара мал басынан сынама алды. Бұл сынамалар зерттеу жүргізу үшін ветеринарлық зертханаға жіберілді. Далада өлген қалған үш бастың өлекселері жабайы жыртқыштардың жеуі мен құстардың шұқып тастау салдарынан сынама алуға жарамсыз деп танылды", - деп түсіндірді Ветеринария комитетінде.

Зертханалық зерттеулердің нәтижелері бір апта ішінде дайын болады.