Биыл Жетісу облысында қызылша бағытындағы сегіз сервистік-дайындау орталығы (СДО) құрылуда. Ол үшін 62 бірлік техника сатып алуға 2,5 млрд теңге бөлінді. Бұл туралы облыс әкімдігінің баспасөз қызметі хабарлады.
"Жетісу" ӘКК деректері бойынша қызылша бағытындағы СДО құру бойынша жобаның құны 2 млрд 514 млн теңгені құрады, оның 1 млрд 754 млн теңгесі – бюджет қаражаты және 760,2 млн теңгесі – "Жетісу" ӘКК қаражаты.
Үш сервистік-дайындау орталығы Сарқан, екеуі Ақсу, біреуі Алакөл, Көксу, Қаратал аудандарында құрылады. Олар 35 шаруа қожалығын біріктірмек.
Қазір 62 бірлік техника сатып алынуда, оның ішінде 28 сепкіш, 19 комбайн, 15 пәлекжинағыш машина. Бүгінгі таңда фермерлерге 22 сепкіш берілді.
Сатып алынатын техника жылдық сыйақы мөлшерлемесі 2,5% және екі жылдық демалыс кезеңімен 10 жыл мерзімге лизингке беріледі.
Сондай-ақ, баспасөз қызметі 2011-2022 жылдар аралығында Жетісу және Алматы облыстарында машина-трактор паркін жаңарту мақсатында 61 сервистік-дайындау орталығы құрылғанын, олар үшін жалпы сомасы 15 млрд теңгеге 1 479 бірлік ауыл шаруашылығы техникасы сатып алынғанын және берілгенін атап өтті.
