Ветеринарлық және фитосанитарлық қадағалау бір құрылымға біріктірілуі мүмкін

Үкімет тамақ өнімдерінің қауіпсіздігін бақылау рәсімдерінде "соқыр аймақтарды" жою мақсатында ветеринариялық және фитосанитариялық қадағалау функцияларын біртұтас құрылымға біріктіруді талқылайды. Бұл туралы ҚР премьер-министрінің баспасөз қызметі хабарлады.

Бүгінгі таңда қадағалау функциялары үш мемлекеттік құрылым арасында бөлінген, нәтижесінде функционалдардың түйіскен жерінде "соқыр аймақтар" пайда болады. Үкіметте бұл мәселе осы жылдың наурыз айында көтерілді және функционалдық талдау жүргізу, үш құрылымды біріктірудің барлық "оң" және "теріс" жақтарын зерттеу тапсырылды.

2007 жылға дейін ветеринарлық және фитосанитарлық қызметтер бөлек жұмыс істеді, 2007 жылдан 2011 жылға дейін бірігіп, 2012 жылдан бастап қайтадан бөлінді.

Ауыл шаруашылығы вице-министрі Рүстем Құрмановтың айтуынша, бүгінде АШМ Ветеринариялық бақылау және қадағалау комитеті ветеринария және тамақ өнімдерінің қауіпсіздігі саласында реттеу, іске асыру және бақылау функцияларын жүзеге асырады. АӨК-дегі мемлекеттік инспекция комитеті өсімдіктерді қорғау және карантин, астық нарығын реттеу, тұқым шаруашылығы, асыл тұқымды мал шаруашылығы бөлігінде агроөнеркәсіптік кешен саласында басшылықты қамтамасыз етеді. Екі комитеттің де аудандарда, облыстарда, республикалық маңызы бар қалаларда өздерінің ведомстволық бағынысты ұйымдары мен аумақтық бөлімшелері (оның ішінде зертханалары) болады.

"Сонымен қатар біз халықаралық тәжірибені зерттедік. Литва Республикасында 2000 жылы реформа жүргізілді, нәтижесінде үш орган біріктіріліп, мемлекеттік азық-түлік және ветеринария қызметін құрды. Осының арқасында ЕО мүшесі болып табылатын Литвада "фермадан үстелге дейін" азық-түлік қауіпсіздігін, сондай-ақ өндіріс, импорт, тасымалдау, сақтау және сауданы толық бақылау жүргізілуде. ҚХР-да экспорттық-импорттық өнімнің қауіпсіздігін бақылауды Бас кеден басқармасы жүзеге асырады. Нәтижесінде дайын тамақ өнімдерін, өсімдік шаруашылығы мен мал шаруашылығын сараптау бір сертификат бере отырып, Бас кеден басқармасының зертханасында жүзеге асырылады. Әзірбайжан Республикасында 2017 жылы тамақ өнімдерінің қауіпсіздігіне мемлекеттік бақылауды, ветеринариялық және фитосанитариялық бақылауды нормативтік реттеуді және тұтынушылардың құқықтарын қорғауды қоса алғанда, процестің барлық кезеңдерінде тамақ өнімдерінің қауіпсіздігіне байланысты басқа да функцияларды жүргізетін тамақ қауіпсіздігі жөніндегі агенттік құрылды", — деді Рүстем Құрманов.

Талқылау қорытындысы бойынша премьер-министрдің орынбасары – сауда және интеграция министрі Серік Жұманғарин бірлестік туралы шешім тек мұқият талдау негізінде қабылдануы тиіс екенін атап өтті. Мәселені терең әрі жан-жақты пысықтау үшін мүдделі ведомстволардың вице-министрлері және стратегиялық жоспарлау және реформалар жөніндегі агенттікті қоса алғанда, басқа ұйымдардың өкілдері деңгейінде жұмыс тобын құру туралы шешім қабылданды.