2023 жылдың басынан бастап Абай облысында мақсатына сай пайдаланылмайтын 130,5 мың гектар жер тәркіленді. Өңірде жалпы ауданы 387,9 мың га болатын тағы 348 жер учаскесі анықталды. Бұл көрсеткіш өткен жылдың салыстырмалы кезеңінен екі есе көп. Бұл туралы облыс әкімінің баспасөз қызметі хабарлады.
Тапсырманы тиімді орындау үшін Абай облысының әкімдігі пайдаланылмаған жерлерді қайтару бойынша ведомствоаралық кіші топ құрды. Табылған барлық фактілер кейіннен учаскелерді мемлекеттік меншікке қайтару мақсатында заңнамада көзделген қажетті шараларды қабылдау үшін өңірдің жер ресурстарын басқару департаментіне берілді.
"Қайтарылған жер учаскелерін кейіннен жергілікті атқарушы органдар заңнамаға сәйкес, негізінен ауыл халқының қажеттіліктерін қанағаттандыру мақсатында бөлетін болады", - деп хабарлады әкімдікте.
Бұған дейін Қазақстан үкіметінде 2022 жылдың басынан бастап жалпы Қазақстан бойынша 8,3 млн га жер қайтарылғаны туралы хабарланған болатын. 271,5 мың гектар алқаптан тағы 183 материал сот органдарының қарауында. 797 жағдайда бұзушыларға жалпы сомасы 156,3 млн теңге айыппұл салынды. Шаралар қабылданғаннан кейін жер пайдаланушылар 689 мың га жерді игеруге кірісті.
2022 жылдан бастап ауыл шаруашылығы мақсатындағы жер учаскелерін беру туралы әкімдіктер қабылдаған шешімдердің заңдылығын тексеру қорытындысы бойынша 526,3 мың га алаңда 515 заңсыз шешім анықталды. 135 шешім жойылды, қалған 380 шешім бойынша оларды жою жөніндегі жұмыстар жүргізілуде.
