Ауыл шаруашылығы дақылдарының селекциясы мен тұқым шаруашылығын дамытудың 2024-2028 жылдарға арналған Кешенді жоспарының жобасы Қазақстанда әзірленді. Оны іске асыру жоғары сапалы тұқымдардың үлесін арттыруға мүмкіндік береді. Сондай-ақ, ауыл шаруашылығы дақылдарының жаңа сұрыптарын құру және аудандастыру тәсілдері өзгертілетін болады. Бұл мәселелер түркі мемлекеттері ұйымына мүше мемлекеттердің ауыл шаруашылығы министрлерінің отырысы аясында Таразда өткен Агро бизнес-форумда және тұқым шаруашылығы жөніндегі конгрессте талқыланды, деп хабарлады ҚР Ауыл шаруашылығы министрлігінің баспасөз қызметі.
ҰАҒБО Басқарма төрағасының орынбасары Дамир Қалдыбаевтың айтуынша, өнімнің бәсекеге қабілеттілігін арттыру үшін мемлекет жаңа сұрыптарды масштабтауға, маркетингке, агроөнеркәсіптік кешен мен сервисті қамтамасыз етуге ерекше назар аударуы қажет. Тұқым шаруашылығын дамытудың Кешенді жоспарын іске асыру сұрыпты құру процесін 10-15 жастан 5-8 жасқа дейін жеделдетуге, селекцияның тиімділігі мен дәлдігін арттыруға әкеледі.
Сондай-ақ, ҰАҒБО командасы Қазақстанның жеті өңірінен 11 еншілес ұйымды тарта отырып, Бараев атындағы ғылыми-өндірістік орталық басқаратын QAZAQ TUQYM консорциумын құруды ұсынды. Консорциумның негізгі мақсаттарының бірі - Қазақстанның әртүрлі табиғи-климаттық жағдайларында отандық ғалымдар жасаған сұрыптарды сынақтан өткізу және іріктеу.
Қабылданған шаралар екі-үш жыл ішінде республиканың белгілі бір аймағы үшін ең қолайлы сұрыптар мен будандарды іріктеуге мүмкіндік береді. Сынақтармен қатар осы сұрыптардың маркетингі бойынша жұмыс жүргізілетін болады. Нәтижесінде кепілдендірілген өнім алу үшін қатаң сақталуы керек сұрыптарды пайдалану бойынша ұсыныстар жасалады. Бұл Қазақстанның тұқым шаруашылығы саласын жаңа деңгейге шығаруға мүмкіндік береді.
