Мәжіліс "Топырақты қорғау туралы" және "Қазақстан Республикасының кейбір заңнамалық актілеріне топырақты қорғау мәселелері бойынша өзгерістер енгізу туралы" депутаттық заң жобаларымен жұмыс бастады. Бір күн бұрын құжаттар Аграрлық мәселелер жөніндегі комитетте таныстырылды, деп хабарлады Мәжілістің баспасөз қызметі.
Жоба авторларының бірі, мәжілісмен Нұржан Әшімбетовтың айтуынша, "Топырақты қорғау туралы" заң жобасының мақсаты топырақты қорғауды тиімді басқару, оларды сақтау және құнарлылығын арттыру, сондай-ақ жердің тозуын болдырмау үшін құқықтық негіз құру болып табылады.
Заң жобасы шеңберінде шаруашылық немесе өзге де қызметті жүзеге асыру кезінде, оның ішінде су басудан, батпақтанудан, тұзданудан, сарқылудан, құрғаудан және тығыздалудан топырақты қорғау жөніндегі талаптар белгіленеді.
Тозған топырақты қалпына келтіру жөніндегі іс-шаралар регламенттеледі, олардың жай-күйін жақсарту жөніндегі талаптар айқындалады.
Жергілікті мәслихаттар мен әкімдіктерге топырақты қорғау саласындағы іс-шаралар жоспарларын әзірлеу және бекіту бойынша жаңа өкілеттіктер беріледі. Басқа нормалар ұсынылады.
Сонымен қатар, ілеспе түзетулермен Жер кодексіне және "Агроөнеркәсіптік кешен мен ауылдық аумақтарды дамытуды мемлекеттік реттеу туралы" Заңға өзгерістер енгізіледі. Олар жердің кадастрлық құнын анықтаудың нақты тетіктерін құруға бағытталған.
