Жетісуда аграрлардан жүгері сатып алуды бастады

Жетісу облысының Ауыл шаруашылығы басқармасы жүгері өнімін сату бойынша бірқатар компаниялармен келіссөздер жүргізді. Сату мәселесі ақыры шешімін тапты. Бұл туралы облыс әкімдігінде хабарлады.

"Дайындаушы компаниялармен жедел түрде жүргізілген келіссөздер алғашқы нәтижелерін берді. Дүйсенбі, 8 қаңтардан бастап "Іетас трейд" компаниясы жүгеріні қабылдауды бастайды. 14% ылғалдылықта баға тоннасына 55 мың теңгені, 14-20% ылғалдылықта 41 500 теңгені құрайды", - деді облыстық ауыл шаруашылығы басқармасының басшысы Нұрдәулет Кененбаев.

Қабылдаудың тәуліктік көлемі 500 тоннаны құрайды. Аграрлар өз өнімдерін Көксу ауданы Балпық би ауылында орналасқан "Уыз Май Industry" зауытының дайындық пунктінде тапсыра алады.

Осы маусымда жүгері өсірушілер өз өнімдерін сақтау және сату мәселесіне, сондай-ақ бағаның төмендеуіне тап болды. Мұның бәрі көптеген шаруашылықтарда егін егістіктерде жиналмай қалуына әкелді.

Мәселе туралы аграрлар Ауыл шаруашылығы вице-министрі Азат Сұлтановқа айтты. Ол бұл мәселе республикалық деңгейде көтерілетінін атап өтті.

"Министрлік тарапынан Ауыл шаруашылығын дамыту бойынша барлық қажетті шаралар қабылдануда. Барлық ұсыныстарды қалыптастырайық, ал біз кәсіпкерлерді қолдауға дайынбыз", - деді Азат Сұлтанов.