Картопты әкетуге тыйым салу күшіне енді

Ауыл шаруашылығы министрлігі "Картопты Қазақстан Республикасының аумағынан әкетудің кейбір мәселелері туралы" бұйрық шығарды.

"Еуразиялық экономикалық одаққа мүше мемлекеттерге әкетуді қоспағанда, Қазақстан Республикасының аумағынан көліктің барлық түрлерімен жаңа немесе салқындатылған картопты (Еуразиялық экономикалық одақтың сыртқы экономикалық қызметінің тауар номенклатурасының коды: 0701) әкетуге алты ай мерзімге тыйым салу енгізілсін", – делінген құжатта.

Картопты әкетуге тыйым салу 28 қаңтарда күшіне енді, алайда, бұрын хабарланғандай, экспортқа фитосанитариялық сертификаттар беру 16 қаңтардан бастап тоқтатылды.

Естеріңізге сала кетейік, картопты экспорттауға тыйым салу туралы шешім сауда қызметі мәселелері жөніндегі ведомствоаралық комиссияның шешімімен қабылданды. Шектеулер ЕАЭО елдеріне қатысты емес, алайда осы бағыттағы экспорт бақылауда болады.

Шектеулерді енгізудің себебі Өзбекстанға экспорттың ұлғаюы және Қазақстанда картоп бағасының күрт өсуі болды. Үкімет экспортқа тыйым салуды және бағаны тексеруді талап еткеннен кейін картоптың құны тұрақтанды.