Қазақстанда құны $600 млн бидайды терең өңдеу зауыты салынады

Қытайлық SHIJIXIANGHE Agribusiness Group Co., Ltd. Қазақстанда құны $600 млн астам бидайды кешенді өңдеу зауытын салуды жоспарлап отыр. Инвестициялық жобаны іске асыру Ақтөбе облысы әкімінің орынбасары, "Ақтөбе" ӘКК басшылығы, ҚТЖ және QazaqGaz өкілдерінің қатысуымен KAZAKH INVEST ұлттық компаниясында өткен кездесуде талқыланды. Бұл туралы KAZAKH INVEST-те хабарлады.

"Қазіргі уақытта SHIJIXIANGHE компаниясы Dalian Hesheng Holdings компаниясымен бірлесіп, жобаны Қазақстанда әрі қарай іске асыру үшін қолайлы өңірді іздестіруде. Өндірісте бидайды өңдеудің жылдық көлемі 1 млн тоннаны құрайды деп күтілуде", - деді компанияда.

Кәсіпорында мал азығын, тыңайтқыштарды өндіру жоспарлануда, ал алынған крахмал кейіннен кешенді өңдеу үшін шикізат ретінде пайдаланылатын болады. Крахмалдан құны жоғары басқа да азық-түлік өнімдерін өндіруді жоспарлап отыр. Шығарылатын өнім негізінен ҚХР-ға және басқа елдерге жеткізілетін болады.

Кездесу барысында тараптар жобаның Қазақстанның агроөнеркәсіптік кешені үшін жоғары маңыздылығын талқылады, бұл өз кезегінде еліміздегі ауыл шаруашылығы өнімдерін терең өңдеу деңгейін едәуір арттыруға мүмкіндік береді.

Қазақстандық өкілдер жер учаскесін таңдауда, қажетті инфрақұрылымды жүргізуде, жобаны кейіннен іске асыру үшін қажетті келісімдер жасауда қолдау шараларын көрсетуге дайын екендіктерін білдірді.