Жамбыл облысында ауыл шаруашылығы өнімдерін қайта өңдеу бойынша бірнеше инвестициялық жобалар таныстырылды. Атап айтқанда, Primus Capital компаниясы аймақта жүгері дәнін өңдеу зауытын салуды жоспарлап отыр. Бұл туралы өңір әкімінің баспасөз қызметі хабарлады.
Бірінші кезеңде зауыттың қуаты жылына 160 мың тоннадан асады, ал кейіннен ол 330 мың тоннаға дейін ұлғайтылады.
Primus Capital ЖШС директоры Сапарбек Тұяқбаев атап өткендей, облыстың ыңғайлы географиялық орналасуы және жоғары өнімділік қысқа мерзімде дайын өнімді экспорттық жеткізуді жолға қоюға мүмкіндік береді.
Айта кетейік, биыл Қазақстанның оңтүстік өңірлерінің фермерлері жүгері өнімін сату және сатып алу бағасының құлдырауы кезінде проблемаға тап болды.
