Қытайлық инвестор Жетісуда пияз өңдеу закытын салады

Қытайлық Qingdao Wanlin Food Co., Ltd Жетісу облысында пияз өңдеу зауытын салуға ниетті. Бұл компания ауылшаруашылық өнімдерін, соның ішінде пияз, сарымсақ, сәбіз, картопты өңдеуге маманданған. Бұл туралы облыс әкімінің баспасөз қызметі хабарлады.

Облыс әкімі Бейбіт Исабаевпен кездесуде Qingdao Wanlin Food Co., Ltd құрылтайшысы және бас директоры Ли Янтао зауытты осы аймақта орналастыру туралы шешім пияз өсіру үшін табиғи-климаттық жағдайларға негізделетінін айтты. Тараптар кәсіпорынды Жетісу облысының аумағында орналастыру мүмкіндігін қарастыруға келісті.

Зауытқа арналған шикізатқа келетін болсақ, бірінші кезеңде Бейбіт Исабаев жергілікті аграрлармен ынтымақтастық орнатуды ұсынды.

"Біз өз тарапымыздан зауытты орналастыру мәселесін пысықтаймыз. Біз сізден болашақ кәсіпорынның егжей-тегжейлі жобасын күтеміз. Әрине, біз үшін инвестициялар, бюджетке түсетін салық түсімдері маңызды, бірақ ең бастысы – лайықты жалақы бере отырып, жергілікті тұрғындарды жұмысқа орналастыру. Жетісу облысының географиялық тұрғыдан ыңғайлы орналасуы бірлескен жобаларды іске асыру үшін кең перспективалар ашатынын атап өткім келеді. Біздің тарапымыздан инвесторларға заңды негізде қажетті қолдау көрсетіледі", - деді Бейбіт Исабаев.