Түркістанда суару жүйелерін шығаратын зауыт іске қосылады

BNK Group LTD компаниясы АҚШ-тың Nelson Irrigation компаниясымен бірлесіп Түркістан облысында айналмалы және фронтальды әсер ететін спринклер машиналарын шығаруды іске қосты. Бұл Қазақстандағы су үнемдеу технологияларын шығаратын алғашқы зауыт. Биыл тағы бір зауыт жұмысын бастайды, деп хабарлады облыс әкімінің баспасөз қызметі.

Құны 4,1 млрд теңге болатын жылына 1000 жаңбырлатқыш машина шығаратын зауыт BNK Group LTD маусым айында пайдалануға беріледі. Кәсіпорын тамшылатып суару жүйелерін 50 мың га, оның ішінде жылына 9 мың га - "Тұран су" МҚК үшін өндіретін болады.

Инвестициялық субсидиялар бағдарламасы шеңберінде фермерлерге су үнемдеу технологияларын енгізуге жұмсалатын шығындардың 50% субсидиялау көзделген, бұл ретте жергілікті бюджет қаражаты есебінен өтеу үлесі қосымша 30% - ға ұлғайтылатын болады.

Сонымен қатар, өңірде сумен қамтамасыз ету үшін бірқатар нысандардың құрылысы басталып, пайдалануға берілді. Атап айтқанда, Түркістан магистральдық каналының 59 шақырымы күрделі жөндеуден өтіп, "Кеңсай-Қосқорған-2" су қоймасы салынды. Сыйымдылығы 68 млн текше метр "Бәйдібек ата" су қоймасы салынуда. Келесі жылы сыйымдылығы 50 млн текше метр су болатын "Боралдай" су қоймасының құрылысын бастау жоспарлануда.