Қазақстанның алты қаласына жақын жерлер бау бақша шаруашылықтарына беріледі

Қазақстанда бау-бақша және саяжай серіктестіктерін орналастыру үшін берілуі мүмкін алты қала маңындағы ауыл шаруашылығы мақсатындағы жер учаскелері мен босалқы жер учаскелерінің схемасы бекітілді. Бұл туралы ҚР премьер-министрінің бірінші орынбасары Роман Скляр Мәжіліс депутаттары тобының сұрауына жауап бере отырып хабарлады.

"Қазіргі уақытта қала маңындағы аймақ алты қала бойынша бекітілген: Астана, Алматы, Ақтау, Тараз, Орал және Петропавл. Қазақстан азаматтарына бау-бақша, сондай-ақ саяжай құрылысы үшін жеке меншікке ауыл шаруашылығы мақсатындағы жерлерден, ауылдық елді мекендерден және қордан 0,12 гектар жер тегін беріледі. Аталған мақсаттар үшін жер учаскелерін қайта тегін беруге жол берілмейді", - деді Роман Скляр.

Ол бұл жерлерді алу құқығын көпбалалы отбасылар да, азаматтардың басқа да санаттары пайдалана алатынын атап өтті.