Жамбыл облысынан ет және ет өнімдерін Катарға жеткізу туралы уағдаластыққа аймақ делегациясының Дохаға сапары барысында қол жеткізілді. Сапар экспорттық мүмкіндіктерді кеңейту және халықаралық байланыстарды нығайту мақсатында ұйымдастырылды, деп хабарлады ҚР АШМ баспасөз қызметі.
Қазақстанның Катардағы елшілігінде Меркі ет комбинаты мен Al Dayat for Trading компаниясы арасында 200 тонна ет пен ет өнімдерін экспорттауға келісімшартқа қол қойылды.
"Біздің өңірдің жоғары сапалы өнімі Катар нарығында үлкен сұранысқа ие болатынына сенімдіміз", - деп атап өтті облыс әкімінің орынбасары Әбілқайыр Тамабек.
Сондай-ақ, "Сарыбас" ЖК, "Сәуле" кондитерлік фабрикасы, "Тараз халва" ЖШС, "KazirAgro" ЖШС, "БСК" және "Ақмол" ЖШС Жамбыл ауыл шаруашылығы өндірушілерінің өнімдері Катар компанияларының үлкен қызығушылығын тудырды.
