Тауарлар
Қызметтер
Тасымалдау қызметі
Ақтөбеде бәйгеден Қазақстан Республикасы чемпионатының аймақтық іріктеу турнирі өтті. Дүлдүлдер жарысына 62 шабандоз қатысып, Құнан бәйге, Топ бәйге, Аламан бәйге бойынша сынға түсті.
Жүйріктер жарысының қалай өткені туралы Ақтөбеге арнайы барған тілшіміз Фариза Мұсақызы тарқатып айтады.
Жәнібек Әнешов — Ақтөбе іргесіндегі «Тайбурыл» қожалығының иесі. Бір кездері қалаға көшіп кеткен ол, ойлана келе, шаруа жайымен ауылдық жерге кері оралыпты. Мақсаты — ат спортын дамыту. Ақтөбедегі тұрғын үйін банкке кепілге салып, Қалмақ елінен жылқылар сатып алып, ат баптайды. Бағымымдағы жылқы тұқымының ірілігімен мақтанған ақсақал бүгінгі бәйгенің өтуін көп күткен.
«Осы ипподромды аяқпен өлшеп жүріп салған адамның бірімін. Оны салуды үш төрт жігіт бастап едік. Қазір бәріміз де шал болдық. Қазақ халқына мынадай той керек. Азғантай халықпыз. Мынадай да халық бар екен ғой деп өзгелер сезінуі керек. Бұл осы елдің иесі екеніңді білдіретін той. Ұлттық спорт ең беделді спорттың бірі», — дейді атбегі Жәнібек Әнешов.
Турнир Ақтөбе облысы әкімдігінің қолдауымен, ҚР Ұлттық спорт қауымдастығы мен «Бәйге» федерациясының ұйымдастырумен өтті. Жарысты тамашалауға еліміздің түкпір-түкпірінен бәйге жанкүйерлері, Ақтөбе облысының әкімі Ералы Тоғжанов пен ҚР Ұлттық спорт қауымдастығының президенті Исламбек Салжанов қатысты.
«2005 жылы ат спорты мектебі ашылып, одан бері Ұлттық спорт түрлері бойынша мамандандырылған спорт мектебі болып қайта құрылды. Онда көкпар, аударыспақ, теңге ілу, қазақ күресі, тоғызқұмалақ бөлімшелері жұмыс істейді. Қазір 400-дің үстінде балаларымыз осы мектепте жаттығуда. Ол балалармен 24 жоғары дәрежелі жаттықтырушы мамандар жұмыс істеуде», – деді Ералы Тоғжанов.
Осындай жобалардың қолға алынуынан болса керек, расымен де, жергілікті халықтың қарасы көп болды. Сол арқылы тұрғындардың, әсіресе, жастардың ұлттық спортқа деген қызығушылығын байқадық.
Турнирге еліміздің бірнеше өңірінен 62 шабандоз қатысып, «Құнан бәйге», «Топ бәйге», «Аламан бәйге» бойынша сайысқа түсті.
Сонымен, сегіз шақырымдық құнан бәйгеден Нұртөбе лақабатты сәйгүлікпен Абзал Тұрғанбек атты шабандоз алғаш болып келді. Екінші, үшінші орындар Батыс Қазақстан мен Ақтөбе облыстарына бұйырды.
Ал он төрт шақырымдық топ бәйгеден бірінші орынды Ботакөз атымен шапқан Ақтөбе облысының шабандозы Арнұр Саматұлы иеленді. Екінші, үшінші орындарды Астана қаласы мен Шығыстан келген мықтылар қанжығасына байлады.
Ал он төрт шақырымдық топ бәйгеден бірінші орынды Ботакөз атымен шапқан Ақтөбе облысының шабандозы Арнұр Саматұлы иеленді. Екінші, үшінші орындарды Астана қаласы мен Шығыстан келген мықтылар қанжығасына байлады.
Соңғы жарыс жиырма бір шақырымдық Аламан бәйгеден Ұлытау атты тұлпар мінген Астана қаласының шабандозы Исламнұр Ертөс бірінші болып келді. Айтпақшы, осы Ұлытау тұлпар Шымкеттегі топ бәйгеде топ жарған болатын.
Келесі орында Қарағанды мен Батыс Қазақстан облыстарының дүлдүлдеріне бұйырды.
Жеңімпаздарға бағалы және қаржылай жүлделер табысталды. Сонымен қатар көрермендер «Ұлттық киім» байқауын да тамашалап тарқасты.
