Американдық мініс жылқысы (Сэдлбред) (American horse)

Тарихы

Кербез американдық мініс жылқысын (saddle bred) он тоғызыншы ғасырдың басында Солтүстік Американың оңтүстік штаттарының колонистары өсіріп шығарды. Бұл жылқы бастапқыда Кентукки штатына жақын жерде өсірілгендіктен кентуккилік мініс жылқысы деп аталды. Плантация иелері әр түрлі тұқымды жылқыларды, соның ішінде наррангасеттік жорғаны (Род-Айлендтен шыққан ағынды жорға), канадалық жорғаны, морганды, гакнені және ағылшынның таза қанды жылқысын өздерінің қажеттіліктеріне сәйкес келетін сапалы пайдалы жылқыны өсіру мақсатында будандастырды. Нәтижесінде, оны өсіруде қолданылған барлық тұқымдардың қасиеттерін үйлестірген, сырт бітімі керемет және қимылдары салт аттыға ыңғайлы мініс жылқысы пайда болды. Бұл әсіресе плантация иелерінің ер үстінде ұзақ сағаттар өткізетін ескере отырып, өз иеліктерін аралап шығуы кезінде қажет болды. Сонымен қатар, бұл жылқы күймеге жегуге де жарамды болды.
Азаматтық соғыс кезінде бұл жылқы тұқымы Америкадағы ең танымалы болды. Конфедерат армиясының атты әскерінің басым көпшілігін американдық мініс жылқысы құрады. Джон Хант Морган мен Натан Бэдфорт Форест бұл жылқыларға ерекше құмар болды. Екі соғысушы тараптың да генералы сэдлбредте мақтанышпен салт мініп жүрді. Соғыстан кейін бұл жылқылар соғыстан оралған сарбаздармен бірге бүкіл Америкаға тарады. 1891 жылы Американдық мініс жылқыларын өсірушілердің негізгі қауымдастығы құрылды және осы тұқымның асыл тұқымдық кітабы жүргізіліп басталды.

Тұқым стандарты

Американдық мініс жылқысының биіктігі 152-173 см, орташа есеппен 155 см. Түсі негізінен жирен, торы, қара торы, баран немесе бөрте болады. Дене құрылымы: басы әсем, үлкен, көздері алыс орналасқан, құлақтары кішкентай, үшкір; танауы кең; мойны ұзын, иілген; шоқтығы айқын, иығы қиғаш; арқасы қысқа, күшті; құйрығы жоғары орналасқан, сауыры етті; аяқтар тік, күшті.

Шаруашылық сипаттамасы

Бүгінгі таңда американдық мініс жылқысын Американың барлық елу штатында, сондай-ақ Канадада, Англияда, Германияда, Голландияда, Скандинавияда, Италияда, Грецияда, Австралияда, Жапонияда және басқа да көптеген елдерде кездестіруге болады. Керемет мінезге, ақылға ие, жаратылысынан салмақты, жүйрік американдық мініс жылқысы әртүрлі мақсаттарда, соның ішінде малмен жұмыс істеу үшін пайдаланылды (қазір де қолданылады). Одан демалысқа арналған керемет жылқы шыққаны таңқаларлық емес, енді оны салт мініліп те, жегіліп те көптеген жарыстарға қатысып жүргенін жиі байқауға болады.

Ұқсас тұқымдар

Американдық квотерхорс (Quarter Horse), Альпілік тұқым (Alpine), Бербер жылқысы (Barb).