Ақ Бускат (Blanc De Bouscat)

Тарихы

Тұқым Францияда 1906 жылы Фландрді, Күміс Шампаньді және Францияның Ангоралық қоянын будандастыру арқылы өсірілді. Қояндарды қоян асыраушылар керемет өнімді қасиеттері мен әдемі, жарқыраған аппақ жүні үшін ұнатып қалды. Британдық қоян өсірушілер қауымдастығы (BRC) тұқымды мойындады және стандартты бекітті. Бүгінде Ақ Бускаттардың жойылып кету қаупі бар және бір кездері өте танымал болған қояндарды Франциядан тыс жерлерден табу оңай емес.

Тұқым стандарты

Ақ Бускат - өте үлкен қоян, алыптарға жақын, салмағы 6-7 кг-ға жетеді. Дене бітімінің түрі жартылай доға тәрізді, арқасы тегіс кең және дөңгелектенген сауыры жақсы дамыған. Тұрқы қзын, мықты, бұлшықетті. Ақ Бускаттың басы үлкен, үлкен шығыңқы профилі бар, беттері толық. Құлақтары мықты, ұзын, ұштары дөңгеленген. Көздері қызғылт немесе қызыл. Жүні тығыз, жібектей, жылтыр, ұзындығы шамамен 3 см. Түсі таза ақ, сәл күңгірт, «аязды».

Шаруашылық сипаттамасы

Ет шығымдылығы орта есеппен 55-60% жетеді. Ұрғашылардың өсімталдығы орташа деңгейде және бір ұяда 8-9 көжекті құрайды.

Қызықты мәлімет

Ақ Бускаттар – қырау басқан сияқты аппақ түсті қояндар, өткен ғасырда әдемі сапалы жүні мен үлкендігіне байланысты көп мөлшерде өсірілді. Сирек қояндар санатына жатқызылған тұқым Франциядан тыс жерлерде белгісіз дерлік және жойылып кету алдында тұр.

Ұқсас тұқымдар

Рейндық (Rhenish rabbit), Арлекин (Danish rabbit harlequin).