Кладруб жылқысы (Кладруб) (Kladruber horse)

Тарихы

Кладруб тұқымы – үлкен жегілетін жылқылардың (күймелі арбаға жегілетін) ежелгі тұқымы. Ол 1579 жылы Чехияда Неаполетан мен Андалусия жылқыларын будандастыру арқылы Кладруба жылқы зауытында XVI–XVII ғасырларда шығарылған. Кладруб жылқыларының және липпиялық тұқым жылқыларының ата-тегі ортақ. Кладруб жылқылары мақсатты түрде патшаның жүруі үшін арнайы өсірілді. Тұқымдық жылқы өзегі тек қана бір зауытта шоғырландырылған. Алдымен әртүрлі түсті жылқылар өсірілді – аққұла, құласұр, ақ шұбар, тарғыл жылқылар кездесті. Бірақ XIX ғасырда тек сұр және қара түстілері қалды. 1918 жылы Австрия-Венгрия монархиясының құлауымен Кладруба жылқы зауыты да құлдырады. Тұқымның саны азая бастады. ХХ ғасырдың екінші жартысында ғана ынтагерлердің күшімен кладруб жылқылары Словакияда, Данияда, Чехияда, Италияда және Еуропаның басқа елдерінде өсіріле бастады. Алайда бүгінгі күні де кладруб жылқыларының саны өте аз.

Тұқым стандарты

Кладруб айғырларының шоқтығына дейінгі биіктігі шамамен 175-180 см, биелердікі - 170-173 см жетеді. Осы тұқым өкілдерінің салмағы 600-ден 700 кг-ға дейін жетеді. Жылқылардың басы ұзын, дөңіс мұрынды, көздері мейірімді, иілген бұлшықетті мойны, әдемі иықтары, кең және терең кеудесі, ұзын жотасы, мықты, бұлшықетті сауыры, қалың жалы мен құйрығы бар. Кладрубтардың аяқ-қолдары күшті және мықты. Жалпы, жылқылар өте әсем көрінеді. Тұқымның түсі тек қара және сұр.

Шаруашылық сипаттамасы

Кладруб жылқысы күшті, төзімді, денсаулығы мықты. Бұл жануарлар жақсы, икемді мінезімен және жігерлі, белсенді темпераментімен сипатталады. Олар сондай-ақ өте епті және шыдамды, ат спорты бойынша тамаша нәтижелер көрсетеді. Негізінен кладруб жылқыларын жегілетін жылқы ретінде қолданады, дегенмен сапалы салт мінетін ат шығару үшін оларды көбінесе жеңіл тұқымдармен будандастырады.

Ұқсас тұқымдар

Владимир жүк жылқысы (Vladimir heavy truck)