Перуандық пасо (Peruvian paso)

Тарихы

XVI ғасырда арасында қандай да бір жорға ат болуы керек болатын, алғашқы конкистадорлар әкелген андалуз бен бербер жылқыларынан тікелей шыққан. Бірқатар будандастырудан кейін жорға аттың қасиеттерін перуандық пасоға беру мүмкін болды, оны сырбаз және үйлесімді қадамы үшін бағалайды (бүйірінен екі тұяғымен тірейтін симметриялы желіс), әсіресе салт аттыға ыңғайлы. Жаңа ғана туылған құлын анасының артынан өзі үшін табиғи қадаммен жүреді. Жүрістің үш түрі ажыратылады: дыбысшыл қадам – баяу және ырғақты; қысқа қадам –жинақты және кербез; кең қадам – шұбалаңқы және жылдам. "Волеоны" (артқы аяғымен соқтығысуды болдырмау үшін бүйіріне доға жасауды) сипаттайтын алдыңғы аяқпен қозғалу, сондай-ақ жағалаудағы шөл жерлердің ауыр және терең құмына бейімделу тән.

Тұқым стандарты

Түсі теңбілді қоса алғанда, барлық түсті болуы мүмкін, бірақ торы мен жирен басым болады; әсіресе басында ақ дақтар жиі кездеседі. Басы пропорционал, жақтары жұқа, көздері айқын және жайнаған, құлақтары кішкентай және өте қимылды; бейіні әдетте түзу, сирек жағдайда жаншылған болады. Мойны доға тәрізді және бұлшық етті, алдыңғы аяқтарды көтеруге мүмкіндік туғызатын, мықты, дөңес арқаға қойылған. Шоқтығы жақсы қалыптасқан, арқа-бел сызығы түзу және қысқа. Іші кең, сауыры қисайған және бұлшық етті. Құйрығы жақсы орнатылған, ұзын және жалы сияқты үлпілдек, жіңішке, жібектей қылдары бар. Аяқтары қысқа және мықты: білектері мықты, тұсарлары қысқа, шабатын буындары кең, сүйегі мықты. Нәлі берік тұяқтары жақсы қалыптасқан, тағалауды сирек қажет етеді. Шоқтығына дейін биіктігі: 142-154 см.

Шаруашылық сипаттамасы

Әлемнің барлық елдеріне экспортталады, АҚШ-та өте танымал. Ол салт аттыны секіріп түсірмейтін және шайқалтпайтын ыңғайлы қадамы үшін бағаланады. Бүгінде ол ауқымды қант құрағы мен мақта плантацияларын бақылауда маңызды рөл атқаруын жалғастырып келеді. Оның табиғи кербездігі "агудез" (алдыңғы аяқтарын шамамен 90 градусқа көтеру қабілеті) және "термино" (алдыңғы аяқтардың бір сарынды қозғалысы) жарыстарында бағаланады - ең жұмсақ және ыңғайлы қадам.

Ұқсас тұқымдар

Парсы арабы жылқысы (Persian arab).