Жергілікті атқарушы органдар бос жер учаскелері туралы ақпаратты тоқсан сайын орналастыруға міндетті. Бұл туралы жоғары аудиторлық палатаның баспасөз қызметі хабарлады.
Ведомствоның мәліметінше, 2021 жылдың маусым айында жер ресурстарын басқару тиімділігіне мемлекеттік аудит жүргізілген. Аудит барысында Жер кодексінде бос жер учаскелері туралы ақпаратты орналастыру бойынша жергілікті атқарушы органдарға қойылатын талаптар жоқ екені анықталды.
Осыған байланысты ҚР Үкіметіне жер кодексіндегі олқылықтарды жою мәселесін қарау жөнінде ұсыныс берілді.
"Осылайша, Жер кодексінің 43-бабының 1-1-тармағына өзгерістер енгізілді, оған сәйкес жергілікті атқарушы органдар мемлекеттік мүлік тізілімінің веб-порталында, өзінің интернет-ресурстарында және арнайы ақпараттық стендтерде бос жер учаскелері және жоспарланған сауда-саттықтар (аукциондар) бойынша ақпаратты халыққа қолжетімді жерлерде деректерді тоқсан сайын жаңарту кезеңділігімен орналастыруға міндетті", - деп хабарлады Жоғары аудиторлық палата.
