Қазақстанда 10 сәуірдегі жағдай бойынша су тасқыны салдарынан 8,1 мың бас Ауыл шаруашылығы жануарлары (ұсақ мал - 6 мың, ірі қара – 1,5 мың, жылқы – 514) өлген. Су басу аймақтарынан қауіпсіз қашықтыққа 88 мыңнан астам ауыл шаруашылығы жануарлары айдалды. Бұл туралы Ауыл шаруашылығы министрлігінің баспасөз қызметі хабарлады.
Су тасқынына қарсы іс-шараларды үйлестіру және су тасқыны кезеңінің салдарын жою жөніндегі республикалық штаб өлген мал иелеріне өтемақы төлеу жөніндегі алгоритмді бекітті. Мал иелерін анықтау, залалды анықтау және басқа мәселелерді шешу үшін жергілікті атқарушы органдар арнайы комиссиялар құрды.
"Су тасқыны салдарынан өлген ауыл шаруашылығы жануарларының иелері жануарлар бойынша деректерді көрсете отырып, жергілікті комиссияға өтінішпен жүгінуі қажет. Ауыл шаруашылығы жануарларын иелену фактісі комиссиялардың актілерімен расталатын болады. Иелеріне өтемақы мөлшері Ұлттық статистика бюросы жариялайтын түрлер мен жыныстық-жас топтары бөлінісінде жануарлардың нарықтық құны туралы деректер негізінде айқындалатын болады", - деп хабарлады баспасөз қызметі.
Сондай-ақ, Ауыл шаруашылығы министрлігі зардап шеккен аймақтардағы эпизоотиялық жағдайды бақылауда ұстайды. Республикалық эпизоотияға қарсы жасақ жануарлардың өлекселерін жою жұмыстарын жүргізуде. Бүгінгі таңда 4,1 мың бас жойылды, премьер-министрдің тапсырмасы бойынша бұл жұмыс күшейтілген режимде жалғасатын болады.
